முக்குலத்தோர் சமுதாயத்தை புறக்கணிக்க நினைத்த எடப்பாடி பழனிசாமிக்கு இந்த தேர்தலில் மிகப்பெரிய தோல்வியை அளிப்போம் - சோழப் பேரரசு கட்சி நிறுவனர் பேட்டி!

MsdMsd
Mar 30, 2026 - 19:42
முக்குலத்தோர் சமுதாயத்தை புறக்கணிக்க நினைத்த எடப்பாடி பழனிசாமிக்கு இந்த தேர்தலில் மிகப்பெரிய தோல்வியை அளிப்போம் - சோழப் பேரரசு கட்சி நிறுவனர் பேட்டி!

கடந்த ஜனவரி 18-ஆம் தேதி திருச்சியில் 78 ஆண்டுகளுக்குப் பிறகு நடத்தப்பட்ட "கள்ளர் எழுச்சி மாநாட்டின்" தொடர்ச்சியாக, அரசியல் அதிகாரத்தை நோக்கி நகரத் திட்டமிட்டிருந்த கள்ளர் முன்னேற்ற சங்கம் மற்றும் சோழ பேரரசு கட்சி, தற்போது அதிமுக தலைமையிலான கூட்டணியிலிருந்து விலகுவதாக அறிவித்துள்ளது.

இது குறித்து அக்கட்சியின் நிறுவனர் தலைவர் வழக்கறிஞர் சரவணன் திருச்சியில் செய்தியாளர்களை சந்தித்து பேசுகையில்,... ​

கடந்த மாநாட்டில் கள்ளர் சமுதாயத்திற்கு வழங்கப்பட்டுள்ள நான்கு விதமான சான்றிதழ் முறையை மாற்றி, ஒரே சான்றிதழ் வழங்க வேண்டும் என்பது உள்ளிட்ட 10 முக்கிய தீர்மானங்கள் நிறைவேற்றப்பட்டன. இக்கோரிக்கைகளை முன்னிறுத்தி, 2026 சட்டமன்றத் தேர்தலில் எடப்பாடி பழனிசாமி தலைமையிலான அதிமுக கூட்டணிக்கு ஆதரவு தெரிவிக்க முடிவெடுக்கப்பட்டது. ​எங்கள் சமுதாயத்திற்கு ஒரு தொகுதி வழங்க வேண்டும் என்ற கோரிக்கையை ஏற்று எடப்பாடி பழனிசாமி உறுதி அளித்தார்.

ஆனால், தற்போது வெளியாகியுள்ள வேட்பாளர் பட்டியலில் முக்குலத்தோர் சமுதாயத்தைச் சேர்ந்த இயக்கங்களுக்குப் போதிய பிரதிநிதித்துவம் அளிக்கப்படவில்லை. இது ஒட்டுமொத்த சமுதாயத்தையும் அவமதிக்கும் செயலாகும். ​

கடந்த தேர்தலில் 10.5% இடஒதுக்கீடு காரணமாகத் தென் மாவட்டங்கள் மற்றும் டெல்டா பகுதிகளில் அதிமுக பின்னடைவைச் சந்தித்துள்ளது. இந்த முறையும் அதே போன்றதொரு தோல்வியை அதிமுக சந்திக்கும். எடப்பாடி பழனிசாமி கொங்கு மண்டலம் மற்றும் வட மாவட்டங்களை மட்டுமே குறிவைத்துச் செயல்படுகிறார்.

முக்குலத்தோர் சமுதாயத்தை அதிகாரத்திலிருந்து ஓரங்கட்ட நினைக்கிறார். இதன் காரணமாக, அதிமுக கூட்டணிக்கு அளித்த ஆதரவை வாபஸ் பெற்றுவிட்டு, சின்னம்மா சசிகலாவை சந்தித்து ஆதரவு தெரிவித்துள்ளோம். ​ 2026 சட்டமன்றத் தேர்தலில் சசிகலா தலைமையிலான அணியுடன் இணைந்து தென் மாவட்டங்களில் தீவிரப் பிரச்சாரம் செய்ய உள்ளோம். ​

கள்ளர் முன்னேற்ற சங்கம் சார்பில் 2 தொகுதிகள் கோரப்பட்டுள்ளன. இது குறித்த அதிகாரப்பூர்வ அறிவிப்பு விரைவில் வெளியாகும். சசிகலா போட்டியிடும் மற்றும் அவர் அறிவிக்கும் அனைத்துத் தொகுதிகளிலும் தங்கள் சங்கம் முழு வீச்சில் களப்பணியாற்றும். ​

தமிழகத்தில் சட்டம் ஒழுங்கு கேள்விக்குறியாகி உள்ளது. போதைப்பொருள் புழக்கம் மற்றும் பெண்களுக்கு எதிரான குற்றங்கள் அதிகரித்துள்ளது.

தமிழக வெற்றிக் கழகத் தலைவர் விஜய் திருச்சி கிழக்கில் போட்டியிடுவது குறித்த கேள்விக்கு,??

மாற்றத்தை விரும்பும் மக்கள் புதிய தலைவர்களுக்குப் பச்சைக் கொடி காட்ட வாய்ப்புள்ளது என்றார். ​

இந்தத் தேர்தல் முடிவுகள் ஒரு "தொங்கு சட்டமன்றத்தை" உருவாக்க வாய்ப்புள்ளதாகவும், கள்ளர் சமுதாயத்தைப் புறக்கணித்த அதிமுகவிற்கு டெல்டா மற்றும் தென் மாவட்டங்களில் டெபாசிட் இழக்கும் நிலையைத் தங்கள் சங்கம் உருவாக்கும் என்றும் வழக்கறிஞர் சரவணன் உறுதிபடத் தெரிவித்தார்.